|
Kompetansesenteret for havenergi offisielt
opna:
Vil bli landets fremste kunnskapsbase
29. oktober 2010
Frå venstre: Prosjektleiar for Kompetansesenter for havenergi ved Runde
Miljøsenter, Martin Jung Leine, Fylkesvaraordførar Svein Atle
Roseth og professor Johannes Falnes. Foto: May Britt Haukås
-“Noen stjeler fra de som kommer etter oss”.
Professor Johannes Falnes frå NTNU i Trondheim siterte
frå songen til Lillebjørn Nilsen på Runde
Miljøsenter torsdag. Den aktive 78-åringen
er den fremste eksperten på bølgjekraft i
Norge, og han heldt hovudforedraget før Kompetansesenteret
for havenergi vart offisielt opna.
- Det er ufornuftig når vår sivilisasjon på nokre
generasjonar brukar opp ressursane naturen har brukt millionar
av år på å lage, sa professor Johannes
Falnes i foredraget sitt. Han har forska på bølgjekraft
i nesten 40 år, og han meiner at satsing på rein,
fornybar og berekraftig energi er den einaste vegen å gå,
om vi skal unngå å stele meir frå framtidige
generasjonar.
Men lett er det ikkje. Alt på slutten av 1700-talet
vart det tatt patent på det første bølgjekraftverket.
I Norge starta forskinga for alvor på 70-talet, med
mellom andre professor Falnes i spissen. Men med oljen og
jappetida på 80- og 90-talet gjekk løyvingane
til denne typen forsking dramatisk ned her i landet. Då er
det kanskje ikkje så rart at ingen enno har funne den
perfekte løysinga: Eit bølgjekraftverk som
produserer nok straum og som toler å stå i havet
over tid. Professor Falnes fortalde fleire historier om kraftverk
som er tatt av bølgjene dei skulle hente energi ifrå.
Professor Johannes Falnes.
Foto: May Britt Haukås
- Og dei som ikkje lærer av fortida, er dømde
til å gjere same feila opp att! For slik er forskinga,
forklarte han: Ein finn oftast ut kva som ikkje fungerer,
men den kunnskapen blir sjeldan delt med andre, det er suksessane
som blir publiserte! Derfor er det viktig at forskingsarbeidet
ikkje stoppar opp, at kunnskapen blir delt, og at folk frå ulike
fagmiljø samarbeider.
Og samarbeid med det maritime fagmiljøet i regionen
var også eit moment fylkesvaraordførar Svein
Atle Roseth var oppteken av. Det var han som stod for den
offisielle opninga av kompetansesenteret for havenergi. Møre
og Romsdal fylke er ein av dei viktigaste bidragsytarane
til senteret, og målet er mellom anna å formidle
kunnskap til skular, politikarar, næringsliv og publikum
generelt.
- Vi skal bli den fremste kunnskapsbasen i landet på energi
frå havet. Når nokon lurer på noko som
har med bølgjekraft, tide- eller osmosekraft å gjere,
skal vi vere den første staden dei kjem på å kontakte
for å få svar, slo prosjektleiar Martin Jung
Leine fast.
Frå venstre: Lars Uggla, Vattenfall, professor
Johannes Falnes og Martin Jung Leine. Foto: Helge Berstad
|
